Powołanie i registracyjŏ
Towarzystwo ôstało powołane bez 16 perzōnōw bezczŏs trefu założycielskigo w Miejskim Dōmu Kultury we Mikołowie 20 paździyrnika 2007 r. 30 stycznia 2008 r. Towarzystwo ôstało zaregistrowane w Krajowym Rejystrze Sōndowym.
Apel do posłōw
5 marca 2008 r. Towarzystwo do kupy ze Ruchym Autōnōmije Ślōnska jak tyż Zwiōnzkym Gōrnoślōnskim swrōciyło sie do posłōw ô podyjmniyńcie inicjatywy prawodŏwczyj coby nadać ślōnskij gŏdce sztatus jynzyka regijōnalnego.
Sztatus ÔPP
Sōnd Rejōnowy Katowice-Wschōd w Katowicach nadōł Towarzystwu sztatus ôrganizacyje pożytku publicznego.
Ekspertyzy naukowe
Towarzystwo swrōciyło sie do uczōnych roztōmajtych dōmyn z pytaniym ô narychtowanie ekspertyz naukowych, kere tykajōm uznaniŏ ślōnskij mŏwy za jynzyk regijōnalny. Na te pytanie ôdpedziało siedmiu uczōnych, kerzi przesłali do Tŏwarzistwa swoje teksty. Byli to dr hab. Jolanta Tambor ze Ślōnskigo Uniwerzytetu, dr Tomasz Wicherkiewicz z Uniwerzytetu miana Adama Mickiewicza w Poznaniu, dr Tomasz Kamusella ze Ôpolskigo Uniwerzytetu, dr Elżbieta Anna Sekuła ze Wyższyj Szkoły Psychologije Społecznyj, dr Artur Czesak z Jagellońskigo Uniwerzytetu, ks. dr hab. Jerzy Dadaczyński jak tyż Juan Lajo z Akadymije Asturyjskigo Jynzyka.
Piyrszŏ kōnferyncyjŏ ô ślōnskim jynzyku
Działŏcze Towarzystwa wziynli aktywny udziōł w ôbradach kōnferyncyje „Ślōnsko gŏdka - jeszcze gwara, abo jednak już jynzyk?”, kerŏ ôdbyła sie w historycznyj zale Ślōnskigo Syjmu. Bezczŏs kōnferyncyje działŏcze Towarzystwa przekŏzali na rynce wicemarszōłek Synatu RP, Krystyny Bochenek, jak tyż wojewody ślōnskigo, Zygmunta Łukaszczyka, rezolucyjŏ, kerŏ wzywała do przichwŏlyniŏ ślōnskigo jynzyka regijōnalnego. Do rezolucyje ôstały załōnczōne ekspertyzy, kere tykały możebności nadaniŏ ślōnskij mŏwie sztatusu jynzyka regionalnego, a kere Towarzystwo dostało ôd uczōnych roztōmajtych dōmyn.
Piyrszy zespōł kodyfikacyjny
Ôd 8 lipnia 2008 do 10 siyrpnia 2009 r. dziōły sie trefy w rōmach niyformalnyj skupiny, kerŏ zajmowała sie ślōnskōm ôrtografijōm. Ôkrōm człōnkōw Towarzystwa Pro Loquela Silesiana, w robotach skupiny brali udziōł tyż działŏcze Tôwarzistwa Piastowaniô Ślónskij Môwy „Danga” jak tyż inkszych gōrnoślōnskich strzodowisk. Robotami skupiny kerowała dr hab. Jolanta Tambor, a bezczŏs tyj roboty swoje ôpinije w tym tymacie wygłosiōł miyndzy inkszymi dr hab. Bogusław Wyderka. Roboty skupiny zakōńczyły sie przijyńciym dokumyntu pt. „Ôgōlne prawidła teoretyczne kodyfikacyje szkryftu”. Ôpisane w tym dokumyncie prawidła stały sie podstawōm ôrtografije nazwanyj niyskorzij „ôrtografijōm ślabikŏrzowōm”.
Człōnki honorowe
20 lutego 2009 r. Walne Zgrōmadzynie Człōnkōw Towarzystwa nadało tytuł człōnka hōnōrowego niżyj pokŏzanym perzōnōm: Lucjan Karasiewicz, Józef Kulisz, Kazimierz Kutz, Maria Nowak, Marek Plura, Andrzej Skupiński, Michał Smolorz, Jolanta Tambor, Bogusław Wyderka. Wszyjske uhōnōrowane perzōny przijynły nadany tytuł.
Kōnferyncyjŏ ô jynzyku regijōnalnym
13 lipnia 2009 r. człōnki Towarzystwa wziynli udziōł w zeôrganizowanyj bez posła Marka Plury kōnferyncyje na tymat ślōnskigo jynzyka regijōnalnego w zale Ślōnskigo Syjmu.
Piyrszy artikel blank po ślōnsku
13 lutego 2009 r. na piyrszyj strōnie Gazety w Katowicach, regijōnalnego przidŏwku Gazety Wyborczyj, ukŏzoł sie piyrszy rŏz w historyje ślōnskojynzyczny artikel. Artikel, kery napisōł red. Przemysław Jedlecki, a na gŏdka ślōnskŏ przełożōł sekretŏrz Forsztandu Głōwnego, Mirosława Syniawa, tykōł tworzyniŏ ślabikŏrza w rōmach projektu „Ślōnski ślabikŏrz – bez ôświata do kultury regijōnalnyj” . Ilustracyjōm artikla bōła fotografijŏ prezesa Towarzystwa, Rafała Adamusa, z roztōmajymi ślōnskojynzycznymi hasłami.
Kōnferyncyjŏ skuli gyburstagu ôd Feliksa Steuera
7 listopada 2009 r. we Sułkowie wele Baborowa delegacyjŏ Towarzystwa wziynła udziōł w ôbchodach 120 rocznice gyburstagu Feliksa Steuera, ślōnskigo dialektologa. Sekretŏrz Forsztandu Głōwnego, Mirosław Syniawa, wygłosiōł referat na tymat twōrczości literackij Steuera.
Gōrnoślōnski ślabikŏrz
Towarzystwo dostało dofinancowanie w rōmach Funduszu Inicjatyw Ôbywatelskich na realizacyjŏ projektu „Ślōnski ślabikŏrz – bez ôświata do kultury regijōnalnyj”. Projekt tyn ryalizowany bōł ôd 1 lipnia 2009 do 30 czyrwnia 2010 r. W jego rōmach powstōł podryncznik pt. „Gōrnoślōnski ślabikŏrz”, kery skłŏdōł sie z 46 lekcyjōw ułożōnych tymatycznie podug chronologije roku szkolnego. Podryncznik przeznaczōny je dlŏ bajtli modszych klas szkoły podstawowyj (preferowanŏ III klasa). W rōmach projektu wydurkowanych ôstało 1800 egzymplŏrzōw podryncznika, kery niyskorzij ôstały przekŏzane do szkōł, bibliŏtyk i dōmōw kultury. Podmioty te mogły podryncznik kupić w ôbniżōnyj cynie 2,50 zł za egzymplŏrz. Po dystrybucyje podryncznika ugŏdanŏ ôstała dycyzyjŏ ô jego dodurku i przeznaczyniu do przedaju kōmercyjnego w ksiyngarniach. Jego przedej ôkŏzoł sie srogim sukcesym. W dalszych latach jeszcze pŏra razy dokōnowany bōł dodurk tego wydŏwnictwa, kere rozeszło sie w wielatysiyncznym nakłŏdzie.
Baner to je to
W 2010 r. Towarzystwo narychtowało baner ô treści: „Ślōnskŏ gŏdka to je to”. Treść jak tyż graficznŏ ôprawa baneru nawiōnzujōm do marketingowego przekazu znanyj marki co kojarzi ślōnskŏ mŏwa i moderność. Baner bez kupa lŏt spotrzebowowany bōł we leda jakich fajerach plynerowych.
Akadymijŏ ślōnskij gŏdki
W lipniu i siyrpniu 2010 r. do kupy ze Gōrnoślōnskim Parkym Etnograficznym w Chorzowie działŏcze Towarzystwa kludziyli zajyńcia na tymat ślōnskij gŏdki a kultury dlŏ uczestnikōw pōłkolōnijōw ze miast Gōrnoślōnskigo Ôkryngu Industryjalnego w zabytkowyj szkole na terynie chorzowskigo skansynu. Zajyncia bōły kludzōne pod hasłym „Akadymijŏ ślōnskij gŏdki”.
Prelekcyje w Ślōnskim Muzeum
W roku 2010 do kupy ze Ślōnskim Muzeum we Katowicach kludzōnych bōło ôziym prelekcyjōw i trefōw pod tytułym „Ô Ślōnsku po ślōnsku”.
Prelekcyje w ChCK-u
Bez lata 2010-11 do kupy z Chorzowskim Cyntrum Kultury kludzōne bōły prelekcyje pod tytułym „Ślabikŏrz niy dlŏ bajtli”.
Nŏrodowy Spis Powszechny 2011
W roku 2011 działŏcze Towarzystwa brali udziōł w informacyjnyj kampanije, kerŏ zachyncała do deklarowaniŏ bezczŏs Nŏrodowego Spisu Powszechnego używaniŏ ślōnskigo jynzyka. Z strzodkōw Towarzystwa wydurkowanych ôstało 1000 plakŏtōw i 100000 ulotek, kere informowały ô możebności deklarowaniŏ we Spisie jynzyka i nŏrodowości ślōnskij.
Syjmowŏ Kōmisyjŏ Myńszości Nŏrodowych i Etnicznych
10 czyrwnia 2010, 30 siyrpnia i 20 września 2012 r. działŏcze Towarzystwa brali udziōł we posiedziyniach syjmowyj Kōmisyje Myńszości Nŏrodowych i Etnicznych, kere tykały sprŏw sztatusu ślōnskij gŏdki i nowelizacyje Gezecu ô myńszościach nŏrodowych i etnicznych a jyznyku regijōnalnym.
We Krakowie z modymi
27 paździyrnika 2010 r. na zaproszynie Wojewody Małopolskigo działŏcze Towarzystwa trefiyli sie z modymi ludźmi ze krakowskich liceōw i ôsprawiali ônym ô ślōnskij gŏdce i poczamu trza jeji kodyfikacyje.
Cajtōngi reklamowe ôd wielgich gyszeftōw
W roku 2010 na zlecynie mikołowskigo gyszeftu Auchan, skuli jego 10-leciŏ, działŏcze Towarzystwa narychtowali ślōnskojyzyczny przekłŏd trzech cajtōngōw reklamowych tego gyszeftu. Cajtōngi te, w ślōnskij wersyje jynzykowyj, kolportowane bōły we wielatysiyncznym nakłŏdzie postrzōd ôkolicznych pōmiyszkańcōw. Akcyjŏ ta cieszyła sie srogim powodzyniym tōż w dalszych latach ôstała powtōrzōnŏ. W roku 2010, ôkrōm gyszeftu Auchan, przekłŏdane bōły tyż cajtōngi gyszeftu Leroy Merlin.
Ślabikŏrz niy dlŏ bajlti
Podug ryalizowanych w Ślōnskim Muzeum i Chorzowskim Cyntrum Kultury prelekcyjōw, sekretŏrz Forsztandu Głōwnego, Mirosław Syniawa, narychtowoł ksiōnżka „Ślabikŏrz niy dlŏ bajlti abo lekcyje ślōnskij gŏdki”, kerŏ ôstała ôstała wydanŏ bez Towarzystwo pod kōniec 2010 r.
Kōnferyncyjŏ ô jynzyku regijōnalnym a ôjczystym
21 lutego 2011 r. Towarzystwo zeôrganizowało we Zale Złotyj Wojewōdzkigo Urzyndu w Katowicach kōnferyncyjŏ „Jynzyk regijōnalny a jynzyk ôjczysty”. Wziynli w ônyj udziōł poseł na Syjm, Marek Plura, człōnek Forsztandu Ślōnskigo Wojewōdztwa , dr Jerzy Gorzelik, prof. Adam Bartoszek i dr Małgorzata Myśliwiec.
Słownik ślōnski w Radyjŏku eM
W 2011 r. Towarzystwo ôstało partnyrym audycyje „Słownik ślōnski” ryalizowanyj bez Radyjŏk eM w Katowicach. Z pauzami projekt ryalizowany je do terŏzka.
Tref u Rzecznika Ôbywatelskich Rechtōw
3 grudnia 2012 r. delegacyjŏ Towarzystwa wziynła udziōł w trefie z Rzecznikym Ôbywatelskich Rechtōw, prof. Irenōm Lipowicz, we warszawskij siydzibie Biōra RRÔ. Tref tyn tykōł skargi Ślōnzŏkōw na ôrgany prawodŏwcze Rzeczypospolityj Polskij, kere ôdkŏzowały upodmiotowiyniŏ ôbywatelōw, kerzi deklarowali nŏrodowość ślōnskŏ a tyż używanie jynzyka ślōnskigo.
Gōrnoślōnskŏ Rada
W 2012 r. Towarzystwo ôstało spōzałożycielym Gōrnoślōnskij Rady, kerŏ bez kupa lŏt robiyła za forōm ślōnskich ôrganizacyjōw pozarzōndowych, kere dziōłały na rzecz uznaniŏ ślōnskigo jynzyka a nŏrodowości.
Tref z delegacyjōm Rady Europy
6 czyrwnia 2012 r. przedstawiciele Towarzystwa we Małopolskim Urzyndzie Wojewōdzkim wziynli udziōł we trefie z delegacyjōm Kōmitetu Poradczego Rady Europy, kery mōnitorowōł ryalizacyjŏ bez Polska postanowiyń Kōnwyncyje Rōmowyj ô Ôchrōnie Myńszości Nŏrodowych. Tref tykōł spraw ôchrōny gŏdki ślōnskij w polskim prawodŏwstwie.
Dybata w Rybniku
8 listopada 2012 r. działŏcze Tŏwarzystwa wziynli udziōł we dybacie „Kōmu wadzi jynzyk ślōnski?”
Gŏdōmy po ślōnsku
W 2011 roku Towarzystwo społym z partnyrami, Fundacyjōm Silesia, Radyjŏkym Fest, portalym Chorzowianin.pl jak tyż Chorzowskim Cyntrum Kultury, napoczło ryalizacyjŏ Akcyje „Gŏdōmy po ślōnsku”. Akcyjŏ mŏ na cylu zachyncać do używaniŏ ślōnskij gŏdki we przestrzyństwie publicznym, w tym w urzyndach, gyszeftach, pōnktach usugowych itd., bez ôznakowanie placōw, w kerych użycie ślōnskij gŏdki bydzie mile widziane, logotypym Akcyje. Rok w rok z postrzodkōw Towarzystwa pokrywany bōł durk abcybildrōw i szykownych tabulek z logotypym Akcyje. Na zaproszynie samorzōndōw przedstawiciele ôrganizatorōw nawiydzajōm urzyndy miast i gmin, w kerych pōmiyszkańcy mogōm sprawić sprawy po ślōnsku, i dŏwajōm przedstawicielom samorzōndōw tabule, kere informujōm ô możebności dogŏdaniŏ sie we tyj gŏdce. W piyrszym ôkresie realizacyje Akcyje prziwstoły dō ônyj amty miast i gmin m.in. Chorzowa, Pszczyny, Piekŏr, Siymianowic, Radlina, Rudy, Tworoga, Lubomie, Chudoby, Chrzōnstkowic i Izbicka. Kożdy rok realizacyjŏ Akcyje kōńczy sie paradnōm Galōm w Chorzowskim Cyntrum Kultury, bezczŏs keryj ôsoby fest zasużōne w propagowaniu gŏdki ślōnskij dostŏwajōm nadgrody Kamrata Ślōnskij Gŏdki.
Poradzisz? Gŏdej!
Bez lata 2014-15 Towarzystwo ryalizowało projekt „Zastŏwianie miynkij dyskryminacyje perzōnōw, kere gŏdajōm po ślōnsku” w rōmach programu Ôbywatele dlŏ Dymokracyje financyrowanego z postrzodkōw Mechanizmu Financowego Europejskigo Przestrzyństwa Ekōnōmicznego. Cołkowity wert projektu wyniōs 188 760,00 zł. W rōmach projektu nakryncownych ôstało 5 filmōw reklamowych jak tyż przekludzōnych ôstało 5 sesyjōw fotograficznych, kere nawiōnzowały do tych filmōw. Zryalizowane filmy udostympniōne ôstały na strōnach internecowych i social-mediach Towarzystwa w rōmach kampanije reklamowyj „Poradzisz? Gŏdej!”. Narychtowane podle fotografijōw materyje graficzne pokŏzane ôstały na 63 bilboardach, 50 CityLightach i 5000 egzymplŏrzach plakŏtōw A1 na terynie cōłkigo Gōrnego Ślōnska, ôd Ôpolŏ po Bielsko. Filmiki reklamowe wyświytlōne ôstały 62 tys. razy w zerwisie YouTube. Internauty sami zamieszczali tyż w social-mediach te filmiki, kere do zakōńczyniŏ trwaniŏ projektu ôbejrzane ôstały 200 tys. razy. 9 podmiotōw wlazło do partnyrstwa medialnego, we tym: Gazeta Wyborczŏ (redakcyje w Katowicach i Ôpolu), telewizyjŏ TVS, Radyjŏk Fest, Radyjŏk Silesia Fm, Chorzowianin.pl, zerwis SilesiaKultura, Radyjŏk Doxa, Radyjŏk Ôpole i Ślōnskŏ Szwalbka. W rōmach projektu dwa razy (przed i po kampanije reklamowyj) zryalizowane ôstały badania socjologiczne postrzōd 500 pōmiyszkańcōw Gōrnego Ślōnska.
Mobilniŏk Samsung
W roku 2014 ze propozycyjōm spōłprŏce zgłosiyła sie do Tŏwarzistwa fyrma Samsung Polska. Dziynki kludzōnym gŏdkōm ôbsztalowane ôstało, iże Towarzystwo przełoży na ślōnski jynzyk pōłne menu mobilniŏka, jak tyż fabrycznie zainsztalowane w mobiniŏkach tyj marki aplikacyje. Prezyntacyjŏ ślōnskojynzycznego menu mobilniŏka marki Samsung bōła 26 marca 2015 r. W nastympnych latach działŏcze Towarzystwa dalij kludziyli projekt bez rychtowanie na zlecynie koryańskigo producynta ślōnskojynzycznych wersyjōw aktualizacyjōw softwaru układowego. Do terŏzka wszyjske telefōny marki Samsung majōm ślōnski jynzyk w nasztalowaniach masziny.
Słownik Gōrnoślōnskij Gŏdki
W latach 2015 i 2020 ukŏzały sie nakładym naszego Towarzystwa II i III wydanie ślōnsko-polskigo i polsko-ślōnskigo słownika, kerego autor, Bogdan Kallus, je człōnkym Pro Loquela Silesiana.
Werbōngi dlŏ Żywca
W 2015 r. działŏcze Tŏwarzistwa na zlecynie Brŏwarnie Żywiec narychtowali ślōnskojynzyczne hasła reklamowe, kere ukŏzały sie na materyjach promocyjnych, w tym bilboardach, bezczŏs kampanije marketingowyj tyj marki. Akcyjŏ ze ślōnskojyzycznymi reklamami tyj marki piwa powtŏrzanŏ bōła w dalszych dwōch latach.
Werbōngi dlŏ Hochlandu
Ôd roku 2016 działŏcze Towarzystwa na zlecynie Agyncyje Reklamowyj „Just” ryalizowali ś niōm ślōnskojynzyczne przekłady kampanijōw reklamowych marki Hochland. Sukces piyrwotnyj kampanije skłōniōł zlecyniodŏwcy do narychtowaniŏ dalszyj kampanije pod hasłym „Ślōnski jynzyk czuje rōżnica”. W rōmach tyj kampanije – ôkrōm sztandardowych graficznych materyjōw promocyjnych – narychtowany ôstōł film reklamowy, ô kerym fest głośno bōło w social-mediach. Kampanijŏ ta ôstała zgłoszōnŏ do nadgrōd branże reklamowyj Golden Arrow. 22 czyrwnia 2017 r. we Warszawie bōła gala, na keryj te nadgrody ôstały prziznane. Kampanijŏ „Ślōnski jynzyk czuje rōżnica”, chociŏż regijōnalnŏ, pokōnała kampanije ôgōlnopolske i zdobōła piyrszŏ nadgroda w kategoryje shopper marketing. Człōnek Forsztandu Głōwnego naszego Towarzystwa – na przileżytość podziyńkowań za nadgroda – zaapelowōł do 500 ôsōb z branże reklamowyj, kere przebywali wtynczŏs na zali, ô pociepniyńcie w dziōłaniach marketingowych stereotypowego wejrziniŏ na Ślōnsk, jego kultura a gŏdka. Niyskorzij kampanijŏ „Ślōnski jynzyk czuje rōżnica” dostała drugŏ nadgroda – w Kōnkursie Kreatura 2017 uznanŏ ôstała za nojlepszy projekt w kategoryje materyje prōmocyjne POS.
Ulotka Crédit Agricole
W roku 2017 Towarzystwo narychtowało ślōnskojynzycznŏ wersyjŏ ulotki reklamowyj banku Crédit Agricole.
Chorzōw witŏ po ślōnsku
W 2015 r. Towarzystwo przedstawiyło swoje forszlagi ślōnskojynzycznych tekstōw na pylonach-witaczach ustawiōnych na granice miasta Chorzōw. Podug propozycyje naszego Towarzystwa na tych kōnstrukcyjach szrajbniynte sōm teksty: „Chorzōw mŏ Wŏs rŏd” ôd strōny wjazdu i „Chowcie sie” ôd strōny wyjazdu z miasta.
Albōm ô Franzu Kafce
W 2016 r. ukŏzoł sie albōm z prŏcami artystōw, sztudyntōw i doktorantōw siedmiu wyższych szkōł artystycznych ze Polski jak tyż Czech. W albōmie pt. „Kafka, przełōmywanie baryjerōw” znŏdły sie aforyzmy Franza Kafki w jynzykach niymieckim, polskim jak tyż ślōnskim. Autōrym ślōnskigo przekładu bōł Jerzy Ciurlok.
Mustry dlŏ kaj ôn SHOW
W roku 2020 r. dlŏ marki kaj ôn SHOW działŏcze Towarzystwa narychtowali ślōnskojynzyczne mustry użytkowe jak tyż scynariusze ślōnskojynzycznych filmōw reklamowych. W dalszych latach kōntynuowanŏ bōła spōłprŏca w rychtowaniu forszlagōw mustrōw użytkowych.
Nŏrodowy Spis Powszechny 2021
W roku 2020 Towarzystwo doszlusowało do niyformalnyj skupiny Ślōnskŏ Sztama, w skłŏd keryj wchodzōm stŏwarziszynia i strzodowiska, kere dziōłajōm na rzecz uzdaniŏ w ôrdōnku ślōnskij myńszości etnicznyj i ślōnskigo jynzyka. Skupina ôstała powołanŏ skuli planowanego ôd 1 kwietnia do 30 września 2021 r. Nŏrodowego Spisu Powszychnego. Cylym pożyniōnych we Ślōnskij Sztamie ôrganizacyjōw bōło zachyncanie ôbywatelōw do deklarowaniŏ we spisie ślōnskij nŏrodowości i jynzyka. Działŏcze Towarzystwa bezczŏs spisu dziōłali aktywnie w tyj sprawie, jednak – skuli pandymie COVID-19 – musieli ôgraniczyć sie do aktywności w Internecu. Po zakōńczyniu Spisu Towarzystwo – społym z inkszymi partnyrami w Ślōnskij Sztamie – apelowało ô przedstawiynie jego wynikōw, bo Głōwny Urzōnd Statystyczny wyjōntkowo dugo zwlykoł z jejich publikacyjōm.
Kōnferyncyjŏ na Ślōnskim Uniwerzytecie
19 lipnia 2023 działŏcze Towarzystwa wziynli udziōł w kōnferyncyje „Naôbkoło ślōnskij gŏdki” ôrganizowanyj bez Insztytut Jyzykoznŏwstwa Ślōnskigo Uniwerzytetu.
Rada Ślōnskigo Jynzyka
1 grudnia 2023 r. Forsztand Głōwny Towarzystwa powołōł Rada Ślōnskigo Jynzyka. Uzdane ôstały Prawidła tyj Rady. W dniach 15 i 22 grudnia przekludzōne ôstały posiedzynia Rady, bezczŏs kerych ôbrane ôstały władze Rady. Sprŏwcōm Rady ôstoł Grzegorz Kulik, a wicesprŏwczynōm prof. dr hab. Jolanta Tambor a Rafał Szyma wicesprŏwcōm. Terŏźny skłŏd Rady: Rafał Adamus dr Artur Czesak Izolda Czmok-Nowak Pejter Długosz Wojciech Glensk Bogdan Kallus Grzegorz Kulik prof. dr. hab. Aleksandra Kunce dr Marcin Maciołek Marcin Melon prof. dr. hab. Jolanta Tambor Szczepan Twardoch Grzegorz Buchalik dr inż. Roman Ptak dr Gabriel Tobor
Tabule przed Miejskim Urzyndym we Świyntochlowicach
W 2023 r. przedstawiciele Towarzystwa brali udziōł w robotach skupiny roboczyj, kerŏ zajmowała sie ôbsztalowaniym szkryftu i szaty graficznyj ślōnskojynzycznych tabulōw ustawiōnych przed Miejskim Urzyndym we Świyntochlowicach. Paradne ôddekowanie tych tabulōw bōło 8 września 2023 r.
Gōrnoślōnski ślabikŏrz ôdnowiōny
W roku 2024 Towarzystwo we spōłprŏce ze Ślōnskōm Bibliŏtykōm narychtowało II wydanie, fest popularnego podryncznika „Gōrnoślōnski ślabikŏrz”. Blank nowŏ i modernŏ je szata graficznŏ ślabikŏrza. Niywielke pōmiany sōm tyż we zamieszczōnch w ślabikŏrzu tekstach.
Kōnferyncyje ô mediacyjach i ynergetyce po ślōnsku
4 czyrwnia 2024 r. przedstawiciel Towarzystwa wziōn udziōł w ôrganizowanyj bez Ślōnske Stŏwarziszynie Mediatorōw Familijnych kōnferyncyje pt. „Mediacyje w ślōnskich szkołach – integracyjŏ i budowanie spōlnoty”. Bezczŏs kōnferyncyje przedstawiōł swoje wystōmpiynie w ślōnskij gŏdce. Podanŏ sytuacyjŏ bōła 7 lutego 2025 r., kej ślōnskojynzyczne wystōmpiynie bōło bezczŏs kōnferyncyje „Zielōnŏ Gmina Wyry”, kerŏ to kōnferyncyjŏ tykała smogu i transformacyje ynergetycznyj. Dziynki tymu tajla panelistōw tyż swoje wystōmpiynia wygłosiyła w ślōnski gŏdce. Działŏczōm Towarzystwa corŏzki czyńścij udŏwŏ sie przekabacić partnyrōw do tego coby ôrganizowane bez nich kōnferyncyje tymatyczne, przinojmnij czyńściowo, ryalizowane bōły we ślōnskij gŏdce.
Medal Wolności Słowa
30 siyrpnia 2025 r. bezczŏs paradnyj gale w Europejskim Cyntrum Solidarności w Gdańsku Towarzystwo ôstało nadgrodzōne Medalym Wolności Słowa w kategoryje Insztytucyjŏ. Medale Wolności Słowa sōm rok w rok prziznŏwane bez Fundacyjŏ Grand Press.