Towarzystwo Pro Loquela Silesiana ôd lot utrzymuje kōntakty ze samorządami i instytucyjami publicznymi, kere sōm zainteresowane prōmowaniym ślōnskij gŏdki.
Dwujynzyczne tabule i napisy
W rōmach akcyje „Ślōnski w przestrzyństwie publicznym” Towarzystwo zwrŏcało sie do samorządōw ô dwujynzyczne tabule i napisy.
Pierwsze takie tabule stanły we Świętochłowicach i we Rudzie Ślōnskij, a potym dołōnczyły inksze miasta.
Wspōłprŏca z urzyndami i ministrowiami
Towarzystwo uczestniczyło we konsultacyjach projektōw ustaw, pism urzyndowych i tłumaczyło dokumenty na ślōnski jynzyk.
Dziynki tym działaniōm ślōnski jynzyk zaczōn sie pokŏzować tyż w oficjalnych przestrzyństwach – we urzyndach, szkołach i medyjach lokalnych.
Apel do posłōw
5 marca 2008 r. Towarzystwo do kupy ze Ruchym Autōnōmije Ślōnska jak tyż Zwiōnzkym Gōrnoślōnskim swrōciyło sie do posłōw ô podyjmniyńcie inicjatywy prawodŏwczyj coby nadać ślōnskij gŏdce sztatus jynzyka regijōnalnego.
Piyrszŏ kōnferyncyjŏ ô ślōnskim jynzyku
30 czyrwnia 2008 r. działŏcze Towarzystwa wziynli aktywny udziōł w ôbradach kōnferyncyje „Ślōnsko gŏdka – jeszcze gwara, abo jednak już jynzyk?”, kerŏ ôdbyła sie w historycznyj zale Ślōnskigo Syjmu.
Bezczŏs kōnferyncyje działŏcze Towarzystwa przekŏzali na rynce wicemarszōłek Synatu RP, Krystyny Bochenek, jak tyż wojewody ślōnskigo, Zygmunta Łukaszczyka, rezolucyjŏ, kerŏ wzywała do przichwŏlyniŏ ślōnskigo jynzyka regijōnalnego.
Do rezolucyje ôstały załōnczōne ekspertyzy, kere tykały możebności nadaniŏ ślōnskij mŏwie sztatusu jynzyka regionalnego, a kere Towarzystwo dostało ôd uczōnych roztōmajtych dōmyn.
Kōnferyncyjŏ ô jynzyku regijōnalnym
13 lipnia 2009 r. człōnki Towarzystwa wziynli udziōł w zeôrganizowanyj bez posła Marka Plury kōnferyncyje na tymat ślōnskigo jynzyka regijōnalnego w zale Ślōnskigo Syjmu.
Syjmowŏ Kōmisyjŏ Myńszości Nŏrodowych i Etnicznych
10 czyrwnia 2010, 30 siyrpnia i 20 września 2012 r. działŏcze Towarzystwa brali udziōł we posiedziyniach syjmowyj Kōmisyje Myńszości Nŏrodowych i Etnicznych, kere tykały sprŏw sztatusu ślōnskij gŏdki i nowelizacyje Gezecu ô myńszościach nŏrodowych i etnicznych a jyznyku regijōnalnym.
Kōnferyncyjŏ ô jynzyku regijōnalnym a ôjczystym
21 lutego 2011 r. Towarzystwo zeôrganizowało we Zale Złotyj Wojewōdzkigo Urzyndu w Katowicach kōnferyncyjŏ „Jynzyk regijōnalny a jynzyk ôjczysty”.
Wziynli w ônyj udziōł poseł na Syjm, Marek Plura, człōnek Forsztandu Ślōnskigo Wojewōdztwa , dr Jerzy Gorzelik, prof. Adam Bartoszek i dr Małgorzata Myśliwiec.
Tref u Rzecznika Ôbywatelskich Rechtōw
3 grudnia 2012 r. delegacyjŏ Towarzystwa wziynła udziōł w trefie z Rzecznikym Ôbywatelskich Rechtōw, prof. Irenōm Lipowicz, we warszawskij siydzibie Biōra RRÔ.
Tref tyn tykōł skargi Ślōnzŏkōw na ôrgany prawodŏwcze Rzeczypospolityj Polskij, kere ôdkŏzowały upodmiotowiyniŏ ôbywatelōw, kerzi deklarowali nŏrodowość ślōnskŏ a tyż używanie jynzyka ślōnskigo
Tref z delegacyjōm Rady Europy
6 czyrwnia 2012 r. przedstawiciele Towarzystwa we Małopolskim Urzyndzie Wojewōdzkim wziynli udziōł we trefie z delegacyjōm Kōmitetu Poradczego Rady Europy, kery mōnitorowōł ryalizacyjŏ bez Polska postanowiyń Kōnwyncyje Rōmowyj ô Ôchrōnie Myńszości Nŏrodowych.
Tref tykōł spraw ôchrōny gŏdki ślōnskij w polskim prawodŏwstwie.
Chorzōw witŏ po ślōnsku
W 2015 r. Towarzystwo przedstawiyło swoje forszlagi ślōnskojynzycznych tekstōw na pylonach-witaczach ustawiōnych na granice miasta Chorzōw. Podug propozycyje naszego Towarzystwa na tych kōnstrukcyjach szrajbniynte sōm teksty: „Chorzōw mŏ Wŏs rŏd” ôd strōny wjazdu i „Chowcie sie” ôd strōny wyjazdu z miasta.
Tabule przed Miejskim Urzyndym we Świyntochlowicach
W 2023 r. przedstawiciele Towarzystwa brali udziōł w robotach skupiny roboczyj, kerŏ zajmowała sie ôbsztalowaniym szkryftu i szaty graficznyj ślōnskojynzycznych tabulōw ustawiōnych przed Miejskim Urzyndym we Świyntochlowicach. Paradne ôddekowanie tych tabulōw bōło 8 września 2023 r.
