Towarzystwo Pro Loquela Silesiana ôd lot utrzymuje kōntakty ze samorządami i instytucyjami publicznymi, kere sōm zainteresowane prōmowaniym ślōnskij gŏdki.

Gōrnoślōnski ślabikŏrz

Towarzystwo dostało dofinancowanie w rōmach Funduszu Inicjatyw Ôbywatelskich na realizacyjŏ projektu „Ślōnski ślabikŏrz – bez ôświata do kultury regijōnalnyj”.

Projekt tyn ryalizowany bōł ôd 1 lipnia 2009 do 30 czyrwnia 2010 r. W jego rōmach powstōł podryncznik pt. „Gōrnoślōnski ślabikŏrz”, kery skłŏdōł sie z 46 lekcyjōw ułożōnych tymatycznie podug chronologije roku szkolnego. Podryncznik przeznaczōny je dlŏ bajtli modszych klas szkoły podstawowyj (preferowanŏ III klasa).

W rōmach projektu wydurkowanych ôstało 1800 egzymplŏrzōw podryncznika, kery niyskorzij ôstały przekŏzane do szkōł, bibliŏtyk i dōmōw kultury. Podmioty te mogły podryncznik kupić w ôbniżōnyj cynie 2,50 zł za egzymplŏrz.

Po dystrybucyje podryncznika ugŏdanŏ ôstała dycyzyjŏ ô jego dodurku i przeznaczyniu do przedaju kōmercyjnego w ksiyngarniach. Jego przedej ôkŏzoł sie srogim sukcesym.

W dalszych latach jeszcze pŏra razy dokōnowany bōł dodurk tego wydŏwnictwa, kere rozeszło sie w wielatysiyncznym nakłŏdzie.

Wspōłprŏca z urzyndami i ministrowiami

Towarzystwo uczestniczyło we konsultacyjach projektōw ustaw, pism urzyndowych i tłumaczyło dokumenty na ślōnski jynzyk.

Dziynki tym działaniōm ślōnski jynzyk zaczōn sie pokŏzować tyż w oficjalnych przestrzyństwach – we urzyndach, szkołach i medyjach lokalnych.

Gŏdōmy po ślōnsku

W 2011 roku Towarzystwo społym z partnyrami, Fundacyjōm Silesia, Radyjŏkym Fest, portalym Chorzowianin.pl jak tyż Chorzowskim Cyntrum Kultury, napoczło ryalizacyjŏ Akcyje „Gŏdōmy po ślōnsku”. Akcyjŏ mŏ na cylu zachyncać do używaniŏ ślōnskij gŏdki we przestrzyństwie publicznym, w tym w urzyndach, gyszeftach, pōnktach usugowych itd., bez ôznakowanie placōw, w kerych użycie ślōnskij gŏdki bydzie mile widziane, logotypym Akcyje. Rok w rok z postrzodkōw Towarzystwa pokrywany bōł durk abcybildrōw i szykownych tabulek z logotypym Akcyje. Na zaproszynie samorzōndōw przedstawiciele ôrganizatorōw nawiydzajōm urzyndy miast i gmin, w kerych pōmiyszkańcy mogōm sprawić sprawy po ślōnsku, i dŏwajōm przedstawicielom samorzōndōw tabule, kere informujōm ô możebności dogŏdaniŏ sie we tyj gŏdce. W piyrszym ôkresie realizacyje Akcyje prziwstoły dō ônyj amty miast i gmin m.in. Chorzowa, Pszczyny, Piekŏr, Siymianowic, Radlina, Rudy, Tworoga, Lubomie, Chudoby, Chrzōnstkowic i Izbicka. Kożdy rok realizacyjŏ Akcyje kōńczy sie paradnōm Galōm w Chorzowskim Cyntrum Kultury, bezczŏs keryj ôsoby fest zasużōne w propagowaniu gŏdki ślōnskij dostŏwajōm nadgrody Kamrata Ślōnskij Gŏdki. W dalszych edycyjach Akcyje Kamratami nadgrodzyni ôstali:
I edycyjŏ:

  1. abp Józef Kupny, metropolita wrocławski
  2. Bernard Błaszczyk
  3. Bernard Krawczyk
  4. Janusz Zygmunt i Visa Bell Śląskie Oblaty
  5. Szkoła Podstawowa nr 25 w Chorzowie

II edycyjŏ:

  1. Robert Talarczyk
  2. Marian Makula
  3. Gmina Tworóg
  4. Piekarnia Ciastkarnia KŁOS
  5. Grupa teatralna „Rehtory na Klopsztandze”

III edycyjŏ: 

  1. Franciszek Buszka, 
  2. Werner Eugeniusz Stoll 
  3. Roman Kurosz
  4. abp Damian Zimoń, były metropolita katowicki
  5. Samsung Polska

IV edycyjŏ:

  1. Grzegorz Zarzycki
  2. Zespół 032
  3. Firma wędliniarska „KUŚ”
  4. Marek Szołtysek
  5. Jan Myrcik
  6. ks. Kazimierz Bartosik

V edycyjŏ:

  1. Ślązacy w Teksasie
  2. Izolda Czmok
  3. Grzegorz Stasiak
  4. Lucjan Czerny 
  5. Mirosław Jędrowski
  6. Hochland Polska

VI edycyjŏ:

  1. Zygmunt Zgraja
  2. bp Andrzej Czaja – Kuria Opole
  3. Alojzy Lysko, 
  4. Grzegorz Poloczek
  5. Józef Kłyk 
  6. Andrzej „Toluś” Skupiński

VII edycyjŏ:

  1. Marcin Melon
  2. Michał Czernecki
  3. Zdzisław Bik
  4. Zespół Pieśni i Tańca „Śląsk”

VIII edycyjŏ:

  1. Franciszek Pieczka
  2. Antoni Sobczyk
  3. Henryk Czich
  4. Teatr Naumiony

IX edycyjŏ:

  1. Dariusz Niebudek
  2. Zbigniew Stryj
  3. Ruch Chorzów 
  4. Jadwiga Spyra
  5. Piotr Długosz 
  6. Jan Musialik

X edycyjŏ:

  1. Zofia Dytko
  2. Mirosław Neinert
  3. Florian Lesik
  4. Dariusz Schmidt
  5. Mirosław Syniawa

Poradzisz? Gŏdej!

Bez lata 2014-15 Towarzystwo ryalizowało projekt „Zastŏwianie miynkij dyskryminacyje perzōnōw, kere gŏdajōm po ślōnsku” w rōmach programu Ôbywatele dlŏ Dymokracyje financyrowanego z postrzodkōw Mechanizmu Financowego Europejskigo Przestrzyństwa Ekōnōmicznego. Cołkowity wert projektu wyniōs 188 760,00 zł.

W rōmach projektu nakryncownych ôstało 5 filmōw reklamowych jak tyż przekludzōnych ôstało 5 sesyjōw fotograficznych, kere nawiōnzowały do tych filmōw.

Zryalizowane filmy udostympniōne ôstały na strōnach internecowych i social-mediach Towarzystwa w rōmach kampanije reklamowyj „Poradzisz? Gŏdej!”.

Narychtowane podle fotografijōw materyje graficzne pokŏzane ôstały na 63 bilboardach, 50 CityLightach i 5000 egzymplŏrzach plakŏtōw A1 na terynie cōłkigo Gōrnego Ślōnska, ôd Ôpolŏ po Bielsko. Filmiki reklamowe wyświytlōne ôstały 62 tys. razy w zerwisie YouTube. Internauty sami zamieszczali tyż w social-mediach te filmiki, kere do zakōńczyniŏ trwaniŏ projektu ôbejrzane ôstały 200 tys. razy. 9 podmiotōw wlazło do partnyrstwa medialnego, we tym: Gazeta Wyborczŏ (redakcyje w Katowicach i Ôpolu), telewizyjŏ TVS, Radyjŏk Fest, Radyjŏk Silesia Fm, Chorzowianin.pl, zerwis SilesiaKultura, Radyjŏk Doxa, Radyjŏk Ôpole i Ślōnskŏ Szwalbka.

W rōmach projektu dwa razy (przed i po kampanije reklamowyj) zryalizowane ôstały badania socjologiczne postrzōd 500 pōmiyszkańcōw Gōrnego Ślōnska. Podle tych badań wyszło, iże: 1/4 mynij kobiyt jak chopōw używŏ ślōnskij gŏdki w robocie, 1/3 kobiyt wiyncyj jak chopōw gŏdŏ, iże niy nauczŏ ani niy chce nauczać ślōnskij gŏdki swojich bajtli, bezma 2 razy wiyncyj kobiyt jak chopōw uwŏżŏ, iże niy potrza nauczać ślōnskigo jynzyka mŏwy we szkole, 1/5 wiyncyj kobiyt jak chopōw nigdy niy ôsprŏwiŏ z cudzymi po ślōnsku, ô 2/3 wiyncyj kobiyt jak chopōw niy zgŏdzŏ sie z tezōm, iże ślōnskŏ gŏdka je gŏdkōm ôdpedniōm do sprawianiŏ spraw w urzyndzie, pōnad 1/4 wiyncyj kobiyt jak chopōw, iże niy ma gŏdkōm ôdpedniōm do sprawianiŏ spraw biznesowych, a pōłowa wiyncyj kobiyt jak chopōw uwŏżŏ, iże ślōnskŏ gŏdka niy ma ôdpedniōm gŏdkōm do ôsprŏwki z pŏraletnim bajtlym.